العيد مش مجرد أيام نزور فيهم حبايبنا وناكل كحك وبسكوت 🤗
العيد فلسفة لو اتعلمتها تعيش مستمتع بحياتك لآخر العمر ..
لو بصيت لتوقيت الأعياد مثلا في أي ديانة، حتلاقي ليه بُعد فلسفي مهم لنفسياتنا.
مثلا العيدين السنويين عند المسلمين، بييجوا بعد حدثين كبار ومهمين ليهم معاني مهمة لصحتنا النفسية
مثلا العيدين السنويين عند المسلمين، بييجوا بعد حدثين كبار ومهمين ليهم معاني مهمة لصحتنا النفسية
🔸️عيد الفطر
بييجي بعد صيام شهر كامل متواصل بما يتبعه من مشقة وتعب وجهاد للنفس ..
شهر بتمنع نفسك من أساسيات الحياة لوقت معين (أكل وشرب) ..
وبتجاهد نفسك في ذنوب وأخطاء ..
وبتغير روتين يومك وحياتك بالكمال علشان يوافق تحقيق هدفك .. اللي هو صيام وقيام الشهر كامل بكل العبادات اللي فيه.
🔸️عيد الأضحى
بييجي بعد ١٠ أيام من السعي والطواف والإحرام ..
١٠ أيام مشقة واجتهاد وحركة مستمرة ..
وتفرّغ كامل لاتصال حقيقي وعميق بينك وبين الله.
والعيدين بيبدأوا بحاجة مشتركة .. قبل ما تبدأ انت تفرح بالعيد
إعطاء المحتاج ..
(زكاة الفطر - وأضحية العيد).
كل دي مش مجرد أفعال وخلاص ..
دي فلسفة تعلّمنا ازاي نعيش ..
وايه القوانين اللي نراعيها علشان نعيش أفضل حياة ممكن ..
فلسفة بشوفها بتتمثل في ٣ نقط
🌱 العمل والراحة
🌱 الهدف والاحتفال
🌱 الفرح والعطاء
🔹️العمل والراحة ..
اشتغل واتعب واجتهد .. اتحرك واعمل كل اللي في وسعك ..
لكن لازم بعدها تاخد فترة راحة .. وإلا متقدرش تكمل.
🔹️الهدف والاحتفال
التحرك والسعي مش كفاية .. تحديد الأهداف شيء أساسي في رحلتك ..
واوعى تقع في خدعة (هدف الوصول).
الهدف الحقيقي هو محطات ترسمها لنفسك وتمشيها ..
النتايج دي بقى بتاعت ربنا.
اربط هدفك بالسعي اللي حتسعاه .. حيكون أد ايه .. في أنهي اتجاه .. تعلم ايه وانت ماشي ..
وسيب الوصول على ربنا يجيبه في الوقت الأنسب ليك
وبعد مشي كل محطة .. تحقيق كل هدف .. لازم تحتفل ..
الاحتفال واحد من قوانين الحياة الصحية ..
يعني مش كفاية تتبسط وتشوف اللي حققته .. دانت تحتفل وتهيص وتعمل حاجات مختلفة عن باقي الأيام تخصصها بس للاحتفال.
🔹️الفرح والعطاء ..
الحياة مش كلها تعب ومشقة زي ما كتير متخيلين ..
الحياة فيها فرح واحتفال واستمتاع ..
وقدرتك على ممارسة الفرحة والاستمتاع هي اللي حتوزن حياتك ..
وحتساعدك تكمل وتنتج وتنجح كتير.
وكل ما تفرح .. افتكر حد محتاج.
والمحتاج مش بس محتاج فلوس ..
فيه محتاج مشاعر .. فيه محتاج طبطبة .. فيه محتاج سؤال عليه وشوية اهتمام
فيه محتاج ضحكة وقعدة حلوة يفك بيها عن نفسه.
وانت ماشي في رحلتك .. افتكر إنك مش هنا علشانك انت بس.
انت جزء من حاجة أكبر
انت معمّر للأرض ومتصل بكل مخلوقاتها
دوّر ازاي تفعّل دورك ده وتفعّل عندك (العطاء) بكل مستوياته 🤍
وآخر حاجة اعرف حاجتين:
مخ الإنسان متصمم على رؤية السلبي وتذكر الوحش وتضخيم القلق والخوف ..
ووقت العيد بيبقى موسم الأفكار السلبية لو منتبهتش ليها!
ده غير الشيطان اللي كل هدفه يعيشنا في حزن ونكد!
فمتديش الفرصة لحد فيهم ..
مارس فعل الفرحة .. وفلسفة الاحتفال.
وكل سنة وانتم في سلام واستمتاع ونور.