العجز لأ
بلاش عجز أرجوك
طب ازاي منحسش بالعجز وسط كل الأحداث اللي حاصلة دي؟
متفهمة جدا والله الشعور .. وأنا شخصيا وقعت فيه قبل كده .. وبقع ساعات
بس بلاش نستسلم لشعور العجز
لأن ده اللي هم عاوزينه
عاوزينا نصدق إننا عاجزين فنفضل قاعدين متثبين مكاننا ومنعملش حاجة
طب نعمل ايه ؟؟
اتنفس
أيوه اتنفس الشعور
طلعه من جواك وانت بتطلع الزفير .. واتنهّد من قلبك وانت مركز تخرّج من جواك شعور العجز
اوعى تسيبه يتخزن جواك .. وإلا عقلك حيصدقه
وحتلاقي نفسك قاعد مش قادر تعمل أي حاجة .. حتى الدعاء
اضعف صح
الضعف سمة بشرية فينا مينفعش ننكرها
لكن نستخدمها صح
روح بين ايدين ربنا واضعف .. اضعف أوي
قوله أنا مش قادر .. أنا ضعيف .. قويني
طلّع كل ضعفك معاه وادعيه كتير
وافتكر إن الدعاء سلاح .. الدعاء قوة .. متستهونش بالدعاء
اتصل باتزان
اوعى تسيب كل حاجة وتقول مش قادر ومتتابعش
فتلاقي القضية ماتت جواك
وصوتنا يضعف وميوصلش لحد
ومشاعر الذنب مش حتسيبك
فحتفضل برضو حاسس بعجز وهوان
ولا تتابع كل تفصيلة صغيرة لحد ما توصل للاحتراق النفسي
وبرضو تبقى مش قادر تتحرك ولا تعمل حاجة
تابع بتوازن .. وخلي متابعتك هادفة
تابع علشان تعرف .. تدعم .. تدعيلهم .. تغضب ليهم غضب صحي .. توّصل وتنشر الحقيقية اللي الكيان وداعميه عاوزين يغطوها
جرعة يومية
اعرف إن انت ليك دور خاص بيك انت .. ربنا خلقك لوظيفة لازم تأديها وتقوم بمهامها
وانت بتتابع القضية حارب في جبهتك
متسيبهاش لأن مش من مصلحتنا الأمة تضعف أكتر
احنا محتاجين نقوى
شوف الحاجة اللي في ايدك تشتغل عليها أو تحققها
وخصصلها جرعة صغيرة كل يوم
متزيدش عن خطوة واحدة تمشيها
معلومة واحدة تتعلمها
دعوة تدعيها من قلبك
عادة سيئة واحدة توقفها انهاردة
حضن واحد لولادك كل يوم
صفحة تقراها
أكشن صغير أوي ناحية هدفك
تخيل لو مشيت كده طول السنة .. حيبقى عندك بنهاية السنة
365 دعوة صادقة من القلب
365 معلومة جديدة اتعلمتها
365 خطوة مشيتها في طريقك
365 عادة سيئة او ذنب وقفته
ثروة نفسية وروحية وعقلية بنيتها على مدار سنة
ب (جرعة واحدة يومية)
فعّل قوّتك
لما بنقول مفيش في ايدينا حاجة .. بتبقى عادة عنينا على حاجة معينة كبيرة أوي تتعمل ومش حنقدر نعملها
فبنقول ونحس ونفكر "إن مفيش في ايدينا حاجة"
بدل ما تعمل كده .. حوّل انتباهك وتركيزك للي في ايدك فعلا
مهما كان صغير
اوعى تستصغر الصغير
نقطة الماء المستمرة تقدر تفتت الحجر
ورقة وقلم واكتب كل اللي تقدر تعمله مهما بان ليك بسيط وملوش لازمة
ادعيلهم كتير
اتبرع بأقل حاجة تقدر عليها
علّم ولادك عن القضية بالقدر اللي يناسبهم
قاطع البراندات والفرنشايز اللي بتدعم الكيان
انشر انشر انشر
اعرف إن الحرب الحقيقية هي حرب إعلامية
وكمية الزيف والكدب اللي بيصرف عليها الكيان علشان ينشرها كبيرة جدا
لازم يبقى فيه قوة مضادة .. واحنا أعدادنا مهولة
والنشر مجاني
وفي النهاية افتكر إن ليك دور والله
فاستعن بالله ولا تعجز