فيه ناس بتعيش حياتها كلها على صورة قديمة ليها مستنياها ترجع
نسخة كانت موجودة زمان واتغيرت مع أحداث الحياة
هي نفسها ظروف حياتها اتغيرت
كانت بنوتة صغيرة .. بقت أم ومسؤولة عن بيت وأسرة
كان شاب مش شايل غير هم نفسه .. بقى رب أسرة وعلى كتافه بيت كامل
كانت بتشتغل وقعدت .. وهكذا
وكأننا عايشين على ظلال نسخة قديمة مننا كنا عايشين بيها في مرحلة ما
بتبقى مش عارف تيعش الواقع بتاعك لأنك مستني النسخة القديمة ترجع
المشكة إنها مش حترجع
دي نسخة كانت موجودة ومتشكلة حسب ظروف ومعطيات حياة اتغيرت دلوقتي
دلوقتي فيه قعدة في البيت بدون شغل مكانتش موجودة قبل كده
دلوقتي انت مسؤول عن أسرة كاملة مكانتش موجودة قبل كده
دلوقتي عندك أولاد واخدين من طاقتك ووقتك وحياتك
مينفعش النسخة القديمة ترجع بمعطيات زمان
لكن ينفع تعملي نسخة جديدة أحلى وأجمل بمعطيات دلوقتي
شوفي ايه الإحساس اللي مفتقداه في نسختك القديمة ونفسك ترجعّيه ؟؟
وقت راحة
ضغوط أخف
عناية بالنفس
شوية انطلاق
شعور بالإنجاز
وابدأي خططي ازاي توصلي للي مفتقداه ده في ظل الواقع بتاعك دلوقتي
بس بشرط
متدوريش انك توصليله بنفس الطرق بتاعت زمان
لأن الواقع بتاعك دلوقتي مش زي زمان
دوري ازاي تحسي بالإنجاز في تربية ولادك
ازاي تعتني بنفسك كأم مش كبنت مورهاش مسؤوليات
ازاي تاخدي وقت راحة ليكي بانتظام
وحطي عليهم اللي اتعلمتيه خلال السنين
النضج اللي حصل
المهارات اللي اكتسبتيها
نفسيتك اللي قويت من أحداث الحياة
ساعتها بس حتلاقي نفسك بتعملي نسخة أفضل من النسخة القديمة اللي كنتي بتدوري عليها
متفضلش عايش على ذكرى نسختك الأولى
اصنع نسخة حديدة أحلى وأنضج باللي مريت بيه
عارفة إن تطبيق ده مش سهل
بس بذمتك .. مش راحتك وسعادتك تستحق شوية تعب ؟؟
يلا ابدأي بإنك تكتبي حاجتين
ايه الإحساس اللي مفتقداه وعاوزة ترجعيه ؟؟
ايه اللي اتعلمتيه وحابة تضيفيه ؟؟