من الحاجات المهمة بالنسبالي أوي في تربية أولادي بناء ثقتهم بنفسهم
بين قوسين كده زي ما بتقول السيكولوجي (تقدير الذات)
شيئ أساسي جدا لأي حاجة في الحياة
ومن غيره بيفضل الإنسان في معاناة داخلية مهما حقق ونجح ووصل
ومن كام يوم واخنا في العربية .. دار الحوار التالي بيني وبين كارمن
معلش يا ماما انا مكنتش مركزة معاكي الشوية اللي فاتت -
ولا يهمك حبيبتي .. بس خير كنتي بتفكري في ايه =
كنت بتكلم مع ربنا -
دي حاجة حلوة أوي .. ممكن تشاركي معايا كنتي بتقوليله ايه؟ =
اه .. كنت بقوله شكرا إنه خلقني حلوة .. وشكرا إنه علمني .. وشكرا إنه بيحبني .. وشكرا إنه اداني قدرات كتيرة أوي -
الله يرضى عنك يا كراميلة 🤗 صح جدا اللي عملتيه وفكرتي فيه =
احنا غاليين أوي .. ومكرّمين أوي
قيمتنا كبيرة .. وعندنا قدرات سوبر
بس كل ده جاي من ربنا .. ومربوط بربنا
واحنا منقدرش نستغنى عنه ولا نبعد عنه
……………………..
على مدار سنين طويلة أوي (أكتر من 14 سنة دلوقتي) بدرس وببحث وبتعلم عن الصحة النفسية
كنت بشوف مدى أهمية تقدير الذات لأي إنسان عاوز يعيش حياة كويسة .. وينجح ويأثّر ويبقى ليه بصمة
بس كمان خلال خبرتي واحتكاكي بالناس، شفت أد ايه المفهوم ده من أكتر المفاهيم اللي فيها تشوّه
ناس كتير فاهماه غلط .. وبتتكلم عنه غلط .. وبتشتعل عليه بشكل الأبيض وأسود
يا عندي ثقة في نفسي ثقة مطلقة وشايف انها تقدر على اي حاجة
يا شايف نفسي ضعيف وقليل الحيلة وربنا هو اللي بيفعل وأنا مليش لازمة
والرؤيتين مغلوطين
بفتكر أوي مقولة علي بن أبي طالب
(من ظن أنه بدون الجهد يصل فهو متمنٍّ، ومن ظن أنه ببذل الجهد يصل فهو مستغنٍ)
الحقيقة إن الوزنة بين ثقتك بنفسك وإحساسك بقيمتها وقدرها العالي أوي
والإيمان إنك ولا حاجة من غير ربنا
وجمع الاتنين في قلبك
حاجة مهمة جدا وضرورية لحياتك
أنا شخصيا اشتغلت عليها مع نفسي سنين
وده اللي ساعدني أزرعها في ولادي
وأتكلم عنها علشان اساعد غيري يفهم ويدرك الوزنة دي
شاركوني ازاي بتحققوا التوازن ده جواكوا؟
وشايفينه ازاي ؟؟