- ماما .. انتي قلتيلي أسمع مشاعري وأسمع جسمي بيقولولي ايه!
= حصل يا كارمن.
- وأنا مشاعري وجسمي دلوقتي بيقولولي إني جاهزة أتكلم معاكي ف اللي حصل.
= انتي صح .. احنا لازم نسمع جسمنا ومشاعرنا بيقولوا ايه ..
وأنا كمان بسمع مشاعري وجسمي ..
ومشاعري وجسمي بيقولولي اني مش جاهزة دلوقتي نتكلم
بس جاهزة آخد حضن لو تحبي 🥰
وحعرفك امتى قادرة نتكلم ف اللي حصل ..
تربية الأولاد على فهم مشاعرهم وتنمية الذكاء العاطفي عندهم ..
واحدة من أهم ضروريات الزمن الحالي.
مبقاش كفاية الولاد عارفين يتكلموا ويعبروا ..
مهم أوي يفهموا مشاعرهم ..
ويتصلوا بنفسهم اتصال حقيقي وعميق ..
علشان يطلعوا شخصيات قوية عارفة تعيش الحياة اللي بتتمناها ..
انهاردة حقولك على ٣ حاجات تعملها لو عاوز تنمي عندك وعند ولادك الاتصال بمشاعركوا وكيفية إدارتها:
🔸️شغّل الرادار
مهم أول تلقط انت مشاعر أولادك قبل ما تكبر وتوصل لل peek
احنا عادة بناخد بالنا من مشاعرهم لما تتضحم أوي ..
يعيطوا من الحزن .. يصرخوا من الغيظ .. يزعقوا من الغضب.
لو ركزت شوية حتلاقي كل المشاعر القوية .. بتبدأ براحة الأول وبالتدريج واحدة واحدة بتعلى
لو عرفت تلقط الشعور عند ابنك/ بنتك بدري .. حيبقى سهل عليك جدا تعلّمه عن مشاعره.
🔸️عرّفهم على بعض
أولادك ومشاعرهم هم زي اتنين ميعرفوش بعض قبل كده ..
قاعدين مع بعض في مكان واحد بس عمرهم ما اتكلموا ولا حصل بينهم تواصل حقيقي ..
ده يمكن حتى ميعرفوش أسماء بعض.
علّم ابنك عن مشاعره ..
اسم الشعور اللي بيمر بيه ايه ..
الشعور ده مخليه عاوز يعمل ايه ويتصرف ازاي ..
ايه الأفكار اللي بتدور في مخه وقت الشعور ده
🔸️ اسمعه مش اسمع كلامه
فرق كبير أوي بين اني أسمع الشعور .. وأسمع كلام الشعور !!
أسمع كلام الشعور .. يعني أعمل اللي مشاعري بتقولي أعمله في الوقت ده
متنرفز .. أقول كلام يجرح.
حزين .. أصد اللي حواليا وأبعدهم عني.
غضبان .. أوجع وأأذي وأعاقب.
أما أسمع الشعور يعني أفهمه ..
أتعاطف مع نفسي ..
أعرف احتياجي ايه في الوقت الحالي
وساعتها حعرف أتصرف بشكل يناسبني ويفيدني مش يضرني ولا يأذي غيري.
🔸️المفتاح الأهم ..
مهما حاولت تعلّم أولادك كل النقط دي ..
وتكررها ليهم مرة واتنين وعشرة ..
مش ممكن يتعلموها لو انت نفسك مش بتمارسها قدامهم كل يوم ..
لو مبقتش جزء من شخصيتك وطبيعتك حيبقى صعب عليهم جدا يتعلموها ويطبقوها.
أنا شخصيا محستش إني نجحت فعلا في تعليم أولادي عن مشاعرهم والاتصال الصح بيها .. غير لما اتمكنت أنا من فهم مشاعري تماما 💯
وإدارتها وتحريكها في الاتجاه اللي يخدم رسالتي وأهدافي ..
مش تبقى مشاعرنا هي اللي محركانا يمين وشمال ونقول لولادنا هم اللي يتحكموا فيها!
وبنقدملك حاليا كورسين يفيدوك جدا في تطبيق كل الكلام ده
كورس تربوي يعلّمك ازاي تتعامل مع تحديات أولادك ..
وايه نمط شخصية ابنك/ بنتك ..
ايه نمط شخصيتك انت كأب/ أم ..
ازاي تتعامل مع نوبات الغضب والعصبية عندك وعندهم ..
ازاي تحملهم المسؤولية الذاتية وتبني عندهم مهارة الانضباط ..
وموضوعات تانية كتير في التربية.
رحلة تعليمية خاصة جدا تفهمك كل حاجة محتاج تعرفها عن مشاعرك ..
مخك وطريقة تكوين المشاعر ..
فهم المشاعر وقراءة رسائلها المختلفة ..
المشاعر السلبية وازاي تديرها بشكل عملي ..
ازاي تزود المشاعر الإيجابية في حياتك وتحولّها ل لايف ستايل ..
وتطبيقات وأدوات عملية خاصة كلها بالمشاعر